中環出更：黃定光引歌神金曲 盼黑暴浪子回頭
香港喺舊年六月開始因反修例風波爆發連串衝突，有唔少涉事者被捕。議員黃定光（象哥）尋日就喺立會大會上，引用「歌神」許冠傑嘅名曲《浪子心聲》嘅歌詞，話希望可以喚醒被政客唆擺、參與暴行嘅青少年。
象哥話舊年嘅反修例示威衝突已影響海外投資者對香港嘅投資信心同意欲，擔心即使香港捱過新冠肺炎疫情，黑色暴力再發生嘅話，經濟會畀呢啲黑暴分子「挑斷手筋腳筋、自廢武功」。佢仲話香港因為咁而變得完全冇競爭力，反問喺咁惡劣嘅環境下，仲有幾多金山銀山作為敗家嘅本錢呢？所以象哥就用咗《浪子心聲》嘅「無知井裏蛙，徒望添聲價，空得意目光如麻，誰料金屋變敗瓦」嚟喚醒青少年。
謝偉銓勉港人同舟共濟
唔止象哥，建築、測量、都市規劃及園境界議員謝偉銓喺發言時都有引用許冠傑嘅名曲作結，但佢就用咗《同舟共濟》嘅歌詞，「既決意留在這條船，齊齊令它不遭破損，困境挑戰，奮勇地面對，令到這條船，永不翻轉，香港是我家」，話希望港人可以捱過疫情喎。
卓妮