加加加，乜都加，加價狂潮百物騰貴，雖然話財爺曾俊華迫於無奈派錢收買人心啫，之但係試問嗰六千蚊又點能夠杯水救車薪？淨係一個港鐵加價已經蠶食晒啦！
話時話，好彩「盲搶鹽」事件好快煙消雲散冇持續落去咋，否則幾十蚊一斤鹽肯定會造成通貨極度膨脹。類似食鹽抗輻射嘅謠言唔好再亂咁傳，搞到中國人出醜仲係小事，瘋狂搶購導致物價飛升先至大鑊。
講到加價之蠻勁與狠樣，港鐵其實都未算。呢嗱嗱嗱，東區海底隧道去年八月申請大幅加價四成，呢家嘢真真正正叫做撳住搶。營運東隧嘅新香港隧道有限公司話喎，盈利未達到合理回報率百分之十五，所以有必要透過申請加價為股東帶來合理回報。呢間怪獸公司仲扮到好可憐咁話，即使加價獲得批准，回報率仍然未夠百分之十五o架。
唉，功夫茶忽然諗起聖公會大主教鄺保羅舊年嘅聖誕文告，佢話家陣流行「仇富人、怨權貴」，呼籲商家唔好「算到盡、食到底」。東隧一加就話加四成，絕對係算到盡、食到底嘅示範單位，難怪人見人仇個個怨啦！
立法會交通諮詢委員會日前就有關申請開會討論，運輸及房屋局透露，隧道公司財政狀況穩健，截至○九年底累積盈利已高達四十七億元，今次申請加價如獲批准，首年收入可增加一億六千多萬元。局方又話曾經要求對方擱置申請，不過受到拒絕，而且堅持盡快將申請提交行政長官會同行政會議審批。
東隧一意孤行，咁點算呢？交諮會部分委員就話嘞，東隧加幅難以接受，認為行政會議應該考慮否決申請，大不了透過仲裁處理，反正以前唔係未試過。
如果你問功夫茶，仲裁到底行唔行得通o架？功夫茶會老實不客氣話畀大家聽，行——唔——通！
喂，政府將東隧加價申請訴諸仲裁係就係試過，可惜次次都係鎩羽而回。九七年仲裁，東隧獲准加價；○五年仲裁，東隧又係獲准加價，而且加幅接近七成。政府係手下敗將，屢敗屢戰唔通真係有機會畀你敗部復活？咪玩啦傻仔！
所以咯喎，與其仲裁，不如回購，由政府出錢回購東隧先至係長治久安嘅解決辦法。計功夫茶話齋，莫講話仲裁行唔通，連官老爺暨同立法會議員齊齊亂噴口水都冇用，唔通你崇尚空談人哋就會買你怕咩？鄺保羅循循善誘都仲有咁多人為富不仁啦，更何況家陣做官嘅冇乜牙力o架咋，始終都係運用財力回購最有效阻止東隧撳住搶！