嘩嘩嘩！港鐵又賺錢，而且一賺就係一百二十億，呢鋪肥仔咯！
不如咁啦，先同大家介紹一大堆數字先。港鐵公布去年純利一百二十億五千九百萬元，按年增長百分之二十五點一；扣除物業重估等基本業務盈利八十六億五千七百萬元，增長百分之十八點五；期內來自物業發展利潤增長百分之十三點五，達四十億三千四百萬元；港鐵派發末期股息，每股四毫五仙。
如果大家係忠實讀者，應該都知道功夫茶唔係咁鍾意冷冰冰嘅數字，尤其係水蛇春咁長唔知幾多個零嘅數字。今次破例當然有原因啦，事關港鐵行政總裁周松崗話喎，公司將於六月根據票價調整機制加價。
唉，等功夫茶不厭其煩講多次，港鐵狂賺一百二十億，按年增長兩成半，即係錢多到想窮都難。既然係豬籠入水，因乜事幹加價呀？唔叫你減價都偷笑啦，大叔！
所以話啫，港鐵真係幾冇良心㗎，名義上大股東係特區政府，應該肩負社會責任先至啱，實際上貪得無厭錙銖必較，十足十無良商家一味賺到盡。
如果大家問，點解香港流行仇官同仇富情意結呀？只要睇睇港鐵你就會徹底明白，狂賺一百二十億照樣加價，咪就係為富不仁嘅貪婪表現囉，試問肉隨砧板上嘅小市民又點會唔仇視你呢？
假使港鐵預計未來營運有困難，加價勉強都話有少少理據，之不過咁喎，周松崗發表業績報告嘅時候係咁講嘅，雖然全球經濟存在不確定因素，但相信今年復甦步伐仍然繼續，預期公司鐵路業務嘅乘客量持續增長。周總仲話，車站商務及物業租務亦將受惠於市況好轉，預期廣告業務會進一步回升。換言之，只要周松崗唔係盲目樂觀，港鐵前景一片秀麗，客量又有增長，廣告又會回升，加價咪等於賺上加賺搜刮民脂民膏囉！
計功夫茶話齋，周松崗最好睇睇新鮮滾熱辣嘅預算案革命，財爺曾俊華手握大量盈餘居然唔肯利民紓困，終於激嬲全人類誓要剷佢落台，結果眾怒難犯之下惟有低低地一鋪，將預算案修訂為直接派錢，另外仲有退稅添。
港鐵情況同政府差不多㗎咋，錢就賺到盆滿缽滿嘞，一講到利民紓困即刻孤寒成性，呢啲咪係叫做犯眾憎囉！
喂喂喂，咪住先，狂賺百二億照樣加價固然係為富不仁啦，港鐵嘅服務有冇改善先？冇耐前之嘛，港鐵路軌接二連三爆裂，而且被揭發諸多隱瞞，搞到多咗一個花名叫做「三不機構」，即係不負責任、不能信賴以及不再安全。貪得無厭又不負責任，激到小市民另外發起一場「反港鐵革命」就唔好啦！