何謂政治？相信大家都記得孫中山先生講過幾句名言，政就係眾人之事，治就係管理，政治亦即管理眾人之事。換言之，政治家等同大管家，有責任將一頭家管理得頭頭是道。
不過好可惜，香港嘅所謂政治家例如曾蔭權通常只係識少少扮代表，管來管去管到一塌糊塗。就以最近一連串嘅預算案風波為例吖，邊有可能一錯再錯派錢派到人人喊打o架！
既然政治關乎全人類福祉，一旦管家失職會有乜嘢後果呢？功夫茶諗起一首歌，叫做《離家出走》，記憶之中曾蔭權都公開讚過幾好聽。即係咁，管家失職必然導致家不成家，甚至有可能家破人亡，家庭成員唔走鬼就笨咯。
環凱國際顧問公司負責人張家禧表示，近年香港移民數字上升，金融海嘯之後已經多咗二至三成，大部分係技術以及投資移民，而技術移民主要係高學歷嘅專業人士例如會計師同工程師等等。
呢嗱嗱嗱，你話死火唔死火？一個地方最寶貴嘅資源就係人才，不妨又引述孫中山先生另一句名言吖，人能盡其才則百事興。家陣移民數字不但上升，而且走鬼嘅主要係高學歷嘅專業人士，百事興冇嘞，百事哀至真！
九七之前嘅移民潮就話恐懼共產黨啫，家陣回歸接近十四年，再次掀起移民潮嘅原因係乜呢？唉，施政無能吖嘛，前景極之黯淡，搞到港產精英信心盡失，惟有飄洋過海重新做人囉。
好似香港嘅教育制度咁吖，簡直就係朝令夕改，三年一小改，五年一大改，莫講話學生無所適從，連為人師表都怨聲載道。你以前幾時聽過教師會上街遊行抗議呢樣聲討嗰樣？你以前又幾時聽過教師會頂唔住壓力而自殺輕生？專業人士最重視下一代嘅教育，寶貝子女喺香港冇可能得到優良嘅讀書機會，咁咪移民囉。香港教育有幾失敗，其實可以從高官身上徹底反映，當你見到個個官二代都係負笈海外嘅放洋留學生，你就明白連高官都對自己嘅施政產品缺乏信心。
至於醫療系統咯喎，更加係千瘡百孔。經常失誤醫死人都唔計嘞，中產階層最睇唔過眼嘅係，交稅交得多，福利乜都冇，正在醞釀出台嘅醫療改革居然話去公立醫院睇病要用者自付，難怪中產自嘲「中慘」，急急腳辦理移民手續。
富貴人家當然冇問題啦，即使一窮二白都叫做有少少福利吊住條命，中產階層永遠係備受忽略嘅一群，又冇辦法撤換失職嘅管家，唔走鬼又可以點？
你試下明年預算案再係咁民怨沸騰吖，移民潮肯定排山倒海！