前線醫生大逃亡，醫管局燒着後欄，醫療衞生高官個個變晒「火燭鬼」周圍撲救。弊在救得呢頭，嗰頭又出煙，顧此失彼，愈救愈大鑊。
前線醫生聯盟前主席羅智峯尋日踢爆，屯門醫院內科醫生近年不斷流失，其實不過係冰山一角，其他專科亦不斷有人辭職唔撈。佢一語中的，指問題出喺醫管局，公立醫院工作量不斷增加，但人手照舊，唔出事就假。呢，好多醫生都話，如果長遠睇唔到情況改善，唔排除劈炮走人。
前線醫護人員做到冇停手，十個煲七個蓋嘅情況已經存在Ｎ咁多年，但醫管局一直唔肯正視。立法會醫學界議員梁家騮就鬧得啱嘞，當局處理問題只係「頭痛醫頭，腳痛醫腳」，資源長期分配不均，今時今日嘅局面，係制度出問題造成嘅惡果。
講真，公立醫院問題愈爆愈多，已經唔係求其加多幾個「蓋」就可以搞得掂。家陣嘅醫管局好似一個穿窿煲，唔係穿一個窿，而係千瘡百孔，補得呢個，嗰個又漏，簡直補無可補，再補盞嘥料，唯一可以做嘅就係揼咗個爛煲，換個新煲。
講番人手短缺問題吖，除咗屯門醫院，其他醫院一樣存在，而且唔止內科，急症室、兒科、放射科，幾乎個個部門都唔夠醫生。公立醫院醫生流失嚴重，醫管局關人個關，唔增撥資源紓緩矛盾不特止，反而不斷向前線加工作量，醫護人員壓力爆煲，唔走至奇啦。
醫生人手嚴重短缺，唔使講，最受影響嘅一定係公立醫院嘅服務質素。近年涉及公院嘅醫療事故無日無之，打錯針、輸錯血、餵錯藥、割錯器官，幾騎呢幾恐怖都有。今日呢間醫院衰咗，聽日嗰間診所有事，直頭係遍地開花，你話呢個爛煲係咪補無可補吖。
公共醫療問題層出不窮，唔只市民忍無可忍，連議員亦拍案而起。日前立法會通過動議，促請港府全面改革醫管局，講出咗全港市民嘅心聲。老實講，醫管局成立二十年，每年花費公帑由最初嘅七十幾億，增至依家嘅三百六十幾億，但呢筆巨款究竟點樣使，納稅人居然一無所知，咁嘅機構唔改革仲成世界嘅。
咁多錢用咗去邊？八成用嚟出糧，其中醫管局高層佔咗相當一部分。唔講唔知，多年來高層累積加薪兩成，而前線員工加薪唔夠半成，肥上瘦下，前線員工實谷爆啦。
醫管局預算年年增加，服務質素就年年下降，市民淨係見到公立醫院管理混亂，醜聞不斷，已經忍夠啦。究竟港府幾時先至肯進行改革，為市民換個平靚正嘅新煲呢？