水皮水皮，確係水皮！水務署作為名聞遐邇嘅「水皮服務署」，果然名不虛傳，服務之水皮簡直係死咗都畀佢激翻生！
呢嗱，就咁，跑馬地黃泥涌道清晨時分爆水管，水深一度超過一呎。大家可能會話，爆水管呢家嘢早就經已係無日無之嘅港產特色啦，搵一日唔爆水管先至係新聞。本來爆水管真係冇乜嘢出奇，奇就奇在水皮服務署竟然要手忙腳亂騰來騰去，騰足六粒鐘先至成功關得上水掣！
大家千祈要記住，六粒鐘只不過係關水掣嘅時間，並唔代表維修完畢。呢個水務署前前後後搞咗大半日先至叫做收拾好爛攤子，附近居民同食肆係咁等呀等，終於等到恢復供水。你知啦，飲食業無水不行，你一話爆水管啫，好多食肆當堂企咗喺度做唔到生意，損失不知幾慘重。仲未計交通大受影響喎，跑馬地一帶半癱瘓，返工返學裙拉褲甩。
水務署話喎，相關水管已經有三十年歷史，每年都有檢查，列入更換名單，不過更換之前爆裂。
關水掣點解要用上六小時咁長？署方話喎，因為水浸，所以難搵，到頭來呢班水皮到瀕臨弱智嘅友仔居然有殺錯冇放過，以大包圍形式關咗二十個水掣，務求總有一個關得啱。咁就變咗殃及池魚嘞，跑馬地周邊地帶一律停水，估計五十萬人陷於乾塘大災難。
唉，每次提到水務署，功夫茶都會有一種啼笑皆非嘅感覺。大家知唔知全香港邊一個係最浪費食水嘅大戶？答案正正就係水務署。水管老化吖嘛，一係日漏夜漏，一係日爆夜爆，每年就咁損失二億立方米珍貴水源，佔總供水量兩成，足以注滿四十七萬個標準泳池，涉及金額係七億大元。喂，年年七億公帑揼落鹹水海呀，用嚟畀孤寒財爺曾俊華轉死性派錢冇咁嬲啦！
水務署十年前已經拍晒心口承諾更換全港水管，可能真係過分水皮兼弱智啩，到咗今時今日仲有超過一半未換。有一點必須補充，水務署原先嘅承諾係十五年完工，家陣只剩五年時間，睇怕如期更換水管一定冇可能，除非大刀闊斧更換所有笨手笨腳連水掣都唔識關嘅低能人士。
根據統計數字顯示，香港平均每日有最少一宗爆水管事件。呢一個數字足以說明，更換水管仲係其次，最緊要係徹底更換水務署嘅笨蛋。
計功夫茶話齋，既然水務署頻頻爆出各式各樣嘅災難，嘥水嘥錢之餘又害到街坊街里雞毛鴨血，不如率先考慮將署長馬利德當作一碌「人形水管」換一換，咁就真係希望在明天嘞！