雖然家陣最熱門嘅城中話題係傻瓜同胞搶購食鹽抵抗來自日本嘅核輻射，有人好鬼抵死咁形容為「急性盲搶鹽」，不過大家應該對於「史上最廢」嘅財政預算案餘怒未消。嗰一個財爺曾俊華其實同搶鹽一族冇乜分別，同樣係傻傻更更，以為「人人六千蚊、注資強積金」可以抵抗通脹，卒之搞到一鑊粥，全城喊打之後改為直接派錢，可惜派錢都冇辦法平息民憤，從而導致一連串示威風波，八歲小朋友居然成為胡椒噴霧受害者。
好嘞，成件事嘅導火線既然係注資強積金，咁大家有乜嘢感想呢？計功夫茶話齋，已經推行十年嘅強積金制度有必要徹底改革，最低限度唔好令人恨之入骨吖嘛。係呀，真係恨之入骨㗎，否則傻瓜同胞曾俊華都唔會萬箭穿心啦！
強積金有兩大弊病，第一係回報率低，第二係管理費貴。有幾貴？正如立法會議員甘乃威話齋，強積金平均基金開支比率雖然降至百分之一點八五，但仍然係澳洲收費嘅六倍，炮轟港府縱容中介公司牟取暴利。
呢嗱嗱嗱，強積金嘅管理費係澳洲嘅六倍呀，你叫香港人點會唔嬲到好似日本核電站爆炸？如果回報率有番咁上下，條氣都可以順少少。可惜吖，根據積金局截至去年底嘅最新數據顯示，二百四十幾萬打工仔總淨供款額為二千七百七十幾億元，總累算權益增至三千六百五十多億元，投資回報係八百七十九億元，扣除所有費用之後，過去十年平均每年回報率只不過係百分之五點五。
大佬，回報率得嗰雞碎咁多，退休人士點養老呀？哈，唔知係賴皮定係死撐，積金局主席胡紅玉居然有一番偉論，佢話喎，強積金並非一個全民退休保障制度，唔係應付退休生活所需，只係提供基本退休保障，市民不能單靠強積金維持退休生活。
喂喂喂，如果強積金唔係應付退休生活所需，因乜事幹要積穀防饑強制供款呢？如果市民不能單靠強積金維持退休生活，咁你不如畀人留番啲錢自由選擇投資項目啦，傻瓜同胞！
所以話啫，你唔去徹底改革強積金制度係唔得㗎，冇理由容許辦事不力嘅基金管理人繼續榨取民脂民膏。不如咁啦，一於將強積金一嘢報廢，然後整一個災後重建，重新建立一套可以應付退休生活所需嘅制度。
胡紅玉小姐，做下好心諗諗辦法照顧風燭殘年嘅公公婆婆啦，退休之後臨老唔過得世好冇陰功㗎，你估老人家「食鹽多過你食米」真係頂得住天災人禍咩！