高天滾滾寒流急，香江路有凍死骨。本港尋日錄得十一年來最低十二月份氣溫紀錄，市區只有五點八度，搞到求助個案激增，平安鐘響個不停。不過咁，有平安鐘都未必可以保證平安㗎。
講都冇人信，呢次寒流吹襲，全港竟有三男三女長者懷疑凍死，包括兩名露宿者。今時今日，堂堂國際大都會居然發生「朱門酒肉臭，路有凍死骨」嘅悲劇，唔止係香港嘅悲哀，更加係香港嘅恥辱。
話時話，凍死人嘅悲劇好多地方都會發生，好似氣溫急跌到零下四十幾度嘅內蒙古，又或者一啲供暖系統突然出現故障嘅東歐國家咁，凍死人一啲都唔出奇。奇怪嘅係，香港地處亞熱帶，凍極都有個限度，寒流之下一日死咗六個人，實在匪夷所思。
當然，凍死人嘅原因有好多，可能涉及其他併發症等因素。但無論點都好，殘酷嘅現實已經為本港敲響警鐘，對弱勢社群嘅生存狀態，社會各界尤其係政府絕對唔可以袖手旁觀，否則，悲劇只會不斷重演。
其實，最令人關注嘅係一班獨居長者，佢哋孤苦無依，長期冇人照顧，萬一有事，後果可大可小。呢，香港仔田灣前日就有一位獨居老婦被發現倒斃住所內，警方相信佢係病發失救，死咗約三個禮拜。如果政府部門、社福機構同身邊嘅人平時主動關心吓婆婆，結果好可能會唔一樣。
話時話，本港人口老化愈來愈嚴重，為長者提供照顧，政府責無旁貸。弊在當局所謂安老講多過做，好似社署嘅「綜合家居照顧服務」咁，話就話為有需要長者提供上門家居服務，但輪候時間勁長，有冇命等到都成問題。呢，有位九十二歲老公公，中過風行動不便，連扭毛巾都唔夠力，諗住申請有關服務，搵人照顧膳食同協助家居清潔，社署居然話要等兩年，你話係咪混帳吖！
就算有命等到，都未必一定幫到長者。有位接受有關服務嘅老人家屋企滿布垃圾，發霉食物隨處放，衣物布滿蜘蛛網，甚至因為冇安排送飯服務，餓到皮包骨。你話嘞，咁嘅家居服務，同虐老有乜分別？
上月底有政黨發表長者退休生活調查報告，近三成受訪者唔滿意退休生活；認為政府照顧老人措施不足嘅，更加接近六成。唔怪得早排國際長者日，大批老人家帶埋枕頭地蓆去禮賓府門外紮營請願，諷刺政府要領生果金嘅長者定期返香港報到，等於逼佢哋瞓街，做游牧民族。事實證明，當局嘅安老政策完全係大隻講。
老吾老以及人之老，安老尊老全社會有責，家人固然要主動關心及照顧長者，社區關懷同協助亦不可少，而政府更有不可推卸嘅責任。天氣冷，人情不能冷，政府更唔可以涼薄，為老人家送暖，應由政府帶頭做起！