「蚊型」晾曬區邨民爭崩頭
公共屋邨合法晾曬區嚴重不足，居民被迫以身試法！秀茂坪寶達邨十三幢大廈、人口逾二萬四千，但僅設兩個「蚊型」晾曬區，加上每年只得限時三個月的晾曬期，爭位晾曬「爭崩頭」的場面不斷出現。居民雖曾多番要求房屋署擴大晾曬區甚至延長期限不果，無計可施下惟有加入非法晾曬行列。區議員與關注團體均狠批房署未有配合居民需要，逼人以身試法。
近日天氣放晴、陽光普照，不過，途經秀茂坪寶達邨的陳先生發現，映入眼簾者盡皆「衫海」，遊樂場、羽毛球場，甚至路邊欄杆均無一幸免，遭衣物與棉被攻陷，「成個球場掛晒衫，你叫人點打波！點解冇人理？」
雖然被指摘破壞邨內景觀，但邨民劉太卻道出不少居民的「苦衷」：「成個邨嘅曬衫位得嗰兩個位，仲只得三個月時間畀你曬，邊度夠？」劉太指現有晾曬區範圍太細，且經常「爆棚」，無計可施下惟有轉移陣地，「去親遊樂場曬（衫）都驚畀保安捉，但真係冇辦法！」劉太希望房署能增加晾曬區，以供邨民使用。
凌晨霸位 曾釀動武
該區區議員洪錦鉉表示，過去曾接獲不少居民反映晾曬區限制太多，「全邨有七千五百幾戶，成二萬幾人，但房署限住晾衫時間同地點，僧多粥少想唔爭崩頭都幾難！」洪指不時有街坊為「霸位」而出現爭拗，「有街坊試過霸位曬衫，凌晨三、四點去等，亦有試過有街坊因為爭位而打交！」
洪曾建議房署增加邨內固定晾曬區及延長晾曬時間，惜均被拒絕，「啲街坊都係因為屋企冇陽光、又冇錢磅洗先落街曬，房署根本冇諗過居民嘅需要！」
房署發言人指出，會在今年五月十五日至八月十五日開放寶達邨兩個晾曬區，即達信樓地下空地及達祥樓平台，供居民晾曬寒衣及棉被。為保持邨內環境美觀及令邨民有足夠休憩空間，暫不會考慮在邨內增加晾曬區。發言人又強調，會視乎天氣情況，及透過屋邨管理諮詢委員會討論，以決定需否延長晾曬區開放時間。
公屋聯會主席王坤亦批評房署做法僵化，「咁大條邨淨係得兩個晾曬區，仲要限時，完全冇諗過居民嘅實際需要。」
王續稱，由於晾曬設施不足，容易引起居民爭執，「政府又成日話要市民和諧，但係小小嘅屋邨設施都提供唔到，仲製造唔少嘅麻煩，點和諧？」
記者 梁少儀