昨日在即市時段，市場已傳政府會在修訂《逃犯條例》事件上作出回應，最終約六時果然公布「撤回」修訂。恒指單日升995點或3.9%報26,523點；國指升252點或2.5%報10,288點，主板成交1,163億元；而滬綜指則升27點或0.9%，報2,957點，動力之強真係近期少見。
大市就升得似模似樣，藍籌股中貢獻恒指頭五大升幅的個股，先後為友邦保險（01299）、騰訊（00700）、滙控（00005）、建行（00939）及港交所（00388），分別推升恒指159點、97點、83點、49點及40點，累計合共貢獻428點，睇落資金臨時臨急「收到風」，又未知買乜股好，故先行押注落重磅股身上，因為包冇死。
至於彈得最勁的板塊，相信非本地地產股莫屬，五大地產股新鴻基地產（00016）、信和置業（00083）、長實集團（01113）、新世界發展（00017）及恒基地產（00012）合共推升恒指112點，至於領展房產基金（00823）及九龍倉置業（01997）亦分別有33點及18點貢獻。咁其實好正路，事關此前話本地樓市因政治事件而受影響，一眾地產股股價累跌不少，但如今發展既然有起色，作一次價值重估都好正常。最奇的是，就連一眾防守股如中電（00002）及煤氣（00003）等股價都分別升3.8%及3.4%，可見資金買貨意欲真係幾大！
策略上，大家都知道，雖然今次政治事件對香港經濟有影響（尤其是地產、零售與旅遊業務），但就並非今回港股大跌市的「主因」，反而在中美貿易戰未解決、美國經濟前景又唔多對路、人民幣貶值潮未退的情況下，港股短期雖因氣氛改善而反彈，但中長線負面因素未除，所以就算睇好後市，亦只宜以小注押注在重磅股身上博反彈，但就絕不要以為是雨後天晴，開心得太早；相反，如果仍有重貨在身，更應趁高減磅而絕非溝貨！
古勝