絲絲講場：聯想黑到痹楊元慶話「頂得住」

聯想集團（00992）董事長兼行政總裁楊元慶日前喺業績發布會後會見內地傳媒，被發現頭髮又白咗啲，楊總話無時間關注髮型及理髮，但就話呢一年以來自己最大嘅變化就係「愈來愈頂得住『被黑』」。

聯想近排可謂頭頭碰着黑，啱啱被指喺國際5G標準投票上無投畀華為，又被鬧同款聯想手提電腦內地售價貴過美國，再到早前被剔出藍籌股等。

最近有調查機構公布，去年聯想在內地只賣出179萬部手機，內地市佔率僅0.4%。既然如此，被問到聯想點解唔索性砍掉手機業務時，楊元慶回應稱：「現在想找一個和智能手機規模相匹配的市場是不容易的，智能手機哪怕只有一個點的市場份額，都很大。」

楊總又話：「中國手機業務已跌到底，沒甚麼可輸的了！」而且中國市場太重要，市場太大，中國市場雖然虧損，但聯想仍會追加投資。

聯想在一四年用約29億美元從谷歌手中收購摩托羅拉（Motorola）智能手機業務後，當時嘅聯想全球智能手機一年出貨9,000萬部，全球排名第三，僅次於三星和蘋果公司。邊估到最近兩年聯想智能手機銷量已江河日下。

楊總認為，聯想手機業務虧損已大幅收窄，目標希望保持在每年5,000萬部左右銷量。被問到希望重新位列全球或內地手機銷量前五位時，楊總笑言：「我們不追求。我們保留現時的規模、費用和成本結構，最容易將業務扭虧！」

咁幾時可以重回香港恒生指數藍籌股行列呢？楊總亦話：「這不是我關心的，也關心不了。我們還是踏踏實實地把業務做好。」

余絲韻

絲絲講場：聯想黑到痹 楊元慶話「頂得住」