今年係中國改革開放40周年，本港有唔少相關活動。絲絲便聽聞香港交易所（00388）下周五（六月一日）會舉行一場「重量級」研討會，邀請到內地多名猛人來港，數數手指，包括人民銀行前行長周小川、中證監副主席姜洋、全國社保基金理事會理事長樓繼偉，以及重慶前市長黃奇帆等專程來港做專題演講。
絲絲去研討會都去得多，但同一時間可以請到咁多名內地猛人來港，都算罕有。聽聞呢個研討會係由全國港澳研究會、香港一國兩制研究中心同港交所等合辦。
研討會主要議題係過去40年，香港喺內地改革開放過程發揮好大作用，但未來香港資本市場嘅角色又如何？故大會將研討會主題定為「新時代香港資本市場再出發」，預計都會探討香港喺新經濟形勢及格局將何去何從。
除咗內地猛人外，香港都唔輸蝕，行政會議成員任志剛係專題演講嘅嘉賓，仲有財爺陳茂波、港交所主席史美倫同行政總裁李小加都會發言，預計研討會有三百幾人參加。
余絲韻