風水輪流轉！這句說話被套用到港股的身上，一樣有效！「風」指的是趨勢，「水」指的則是資金。幾個星期前，股王騰訊（00700）的風頭一時無兩，無人敢去Put佢，其他股份亦睇唔到佢的尾燈。日前，騰訊於成交額榜上漸被追近。為甚麼呢？不就是因為「風」同「水」都已經吹到另一頭了，所說的是內房。
以周一為例，我任你亂點一隻內房的龍尾股，都可以fight低騰訊。所以，近日有粉絲問我騰訊幾錢撈底，我答佢話求其搵隻內房炒下好過啦！
講到內房，有人對中國恒大（03333）日升夜升感到大惑不解，最不可思議的是，上周三升17%，周一又再升22%，倘計及周一是無北水的話，就連美圖公司（01357）都比下去！莫非是炒賣樓數據？抑或是回歸A股？都解釋不到咁大的升幅吧？
理性的解釋不到，就惟有走非理性的。網絡傳聞話：恒大集團於早前曾向貴州省畢節市無償捐資30億元人仔來協助當地扶貧，又承諾於未來再捐多80億元人仔，不但只咁呀，集團還派逾2,000名員工（相當於總體員工數目的2.4%）抵達當地，仲話明唔脫貧唔返嚟添！
莫非集團準備撈過界，要做埋NGO？非也、非也！聽聞係同年底召開的十九大會議有關，政治的原因，你懂的！但你問，升到15元了，夠皮未？對於目前已有貨的粉絲，我會說「揸到有日下跌為止」；對於只係等運到的粉絲，我會話「去搵隻準備破頂的內房博一博，好似無咁驚喎」，就例如越秀地產（00123）或龍光地產（03380）吖。內房應該係短期內最值揸的板塊之一！
富昌金融研究部總監 譚朗蔚（作者為註冊持牌人士）