講起期貨就諗起追收孖展、被斬倉？其實大可「Think Positive」，只要嚴守止蝕、控制注碼，投資期貨亦可輕輕鬆鬆無有怕！
投資農產品可以話係睇天做人，天氣變化自然係主要取決價格變動嘅因素，而對貨幣及地緣政治嘅敏感度就唔及黃金及原油期貨咁強烈。供求關係都係重要因素，求過於供嘅市況及相關預期自然可帶挈價格上升。
美國、中國及加拿大係北半球農產品主要出產國；而阿根廷同巴西就係南半球嘅主要出產國。例如大豆產地主要來自美國、巴西及阿根廷，事實上，農產品出產地都幾集中，投資者只需要記住主要出產國，去建立對農產品期貨嘅投資觸覺就OK啦。
炒股大可「跟風炒」，但係媒體鮮有報道期貨消息，唔怪得啲投資者卻步。其實醒目嘅散戶大可自行發掘刺激期貨市場嘅重要數據，例如美國農業部（USDA）報告，其中以公布農作物種植面積、播種進度、收割進度及出口銷售數據嘅報告最重要。
唔少股友炒股都會即日鮮，但係期貨市場嘅升勢或跌勢大多可以持續一至兩個月，所以散戶需要耐性部署。一般投資者主力以成交量最大嘅活躍月期貨為主，惟需注意到期日及嚴守止蝕位。新手可以投資入場門檻較低嘅期貨試水溫，好似原糖期貨或迷你合約。
以在芝加哥期貨交易所（CBOT）買入小麥期貨為例：
盈虧計算方程式 ＝（買賣差價 X 合約值 X 手數）
˙未計手續費，假設以610美仙買入1手小麥期貨，並於690美仙沽出1手同月份合約平倉：
利潤為 [（6.9-6.1）X 5,000 X 1] 美元＝4,000美元
˙未計手續費，假設以700美仙買入1手小麥期貨，並於620美仙沽出1手同月份合約平倉：
虧損為 [（7-6.2）X 5,000 X 1] 美元＝4,000美元
每家期貨商交易保證金、維持保證金，以至佣金收費都唔同，散戶要眉精眼企選擇期貨商。假設以收市價計算戶口價值少過維持保證金1,500美元，投資者就要補交保證金（俗稱補倉）至基本保證金1,650美元，如果唔係就會被平倉止蝕（斬倉）。
Kitty、彩兒
若有料報畀彩兒同Kitty或有嘢問，可電郵money.biz@on.cc