絲絲講場：絲打學炒股買包包悟道！
上星期嘅財經新聞中，你只對Coach（06388）買起Kate Spade有印象？至於其他財經嘢就覺得好難明？查實金融市場嘅運作同你買賣名牌袋差不多，以下一睇就明。
1、一級市場（Primary Market）vs 二級市場（Secondary Market）
直接去名牌專門店買新上市手袋係「一級市場」，去米蘭站買賣手袋就係「二級市場」交易。
2、期貨（Futures）
專門店將推限量版手袋，定價1萬元，半年後先有貨。你預計款袋到時炒價/價格起碼值1.5萬元，你依家即畀錢預訂，就等於買咗手袋「期貨」，到期攞貨。
3、槓桿（Leverage）
你預訂咗款半年之後先有貨嘅限量版手袋，定價1萬元，但你係VVIP，預訂每個只需要落訂1,000元，你用1萬元預訂咗10個袋，咁就叫做「槓桿」比率1比10。貨到時，若手袋升值到1.5萬元，你賣晒就賺5萬元。
4、沽空（Short Sell）
今次你係開舖嘅，專售歐洲名牌袋。你預計一個月後歐元會跌一成，現時你雖冇貨在手，但照接客人訂單訂袋100個，你應承兩個月後交貨。過咗一個月歐元真係跌一成，你即刻買入100個袋用作交收，咁就係「沽空」再補貨交收，賺取差價。
有客想買一款袋，你自己無貨，於是由同行「借調」一個返來賣畀客，仲應承過幾日還個一樣嘅袋畀同行。過幾天歐元跌咗，你用平啲價錢買返個還畀同行。
5、止蝕（Stop Losses）
你見去年有款袋好賣，買咗一批囤喺屋企，點知熱潮好快過，你於是降價為求全部賣晒，以免血本無歸。
6、期權（Options）
今次你係名牌二手店嘅VVIP，間舖喺你生日月份寄優惠信畀你，指明憑信可以喺該月內以特惠價5,000元買款原標價6,000元嘅手袋。咁就係間舖向你發出「認購期權（Call Option）」，5,000元就係「履約價（Strike Price）」。
相反，若生日優惠係畀你可以6,000元將回收價一向只值5,000元嘅某款手袋賣返畀間舖，你所得嘅就係「認沽購（Put Option）」，6,000元就係履約價。
呢個優惠（即係個期權）有限期，你生日月份過後唔行使就作廢。但如果有Friend咁啱正想買或賣嗰款袋，你就可以將封優惠信「賣」畀朋友，自己賺番一筆。
余絲韻