孖妹S檔案：期貨搵食 邊隻最和味？

潘：亞達盟環球期貨副總裁 潘志偉

劉：敦沛期貨董事總經理 劉艷玲

彩兒：雖然期貨交易已經唔係新嘢，但係好多散戶Friend都話唔太識玩，聽聞今年主要因為厄爾尼諾現象影響，同埋烏克蘭政局不穩，唔少農產品嘅價格都彈得好犀利喎！

潘：本地嘅期貨散戶多數較留意黃金、金屬及能源相關期貨，而農產品同埋牲畜期貨，好似玉米、小麥同大豆對佢哋嚟講，波幅及成交量就好似二線股咁，而冷門啲嘅橙汁、瘦豬期貨就好似二線尾、三線股，呢類期貨雖然成交唔似黃金期貨咁活躍，但其實都有炒作空間o架，可以小注試敲，不過需留意期貨涉及孖展及槓桿，散戶一定要控制注碼及留意風險。

Kitty：咁有咩期貨係食得落肚o架？

劉：我哋平時早餐成日會食嘅嘢，好似咖啡、可可、小麥、橙汁、糖，甚至煙肉原材料豬肉喺期貨市場都有交易！因為農產品交易量佔全球六分之一嘅巴西及美國，分別受旱災、極端天氣等等厄爾尼諾現象影響，加上穀物出口大國烏克蘭政局不穩，刺激多種農產品價格爆升，其中今年升得最勁嘅係咖啡期貨，今年曾經大升近八成，不過已經回落唔少，瘦豬期貨就持久力強啲，年內都升超過三成o架！

瘦豬期貨交投活躍

彩兒：瘦豬期貨？有冇人炒o架？成交量低會好難炒o架喎！

潘：因為發達國家，好似美國咁，有唔少農夫同埋商家利用瘦豬期貨做價格對沖，所以成交量一啲都唔失禮，五月份每日平均成交量有成42,523張，瘦豬都算係我近期嘅個人心水。因為肆虐美國30個州份嘅病毒PEDv，已經導致幾百萬隻幼豬死亡，豬肉市場喺缺乏新血下產量自然少，推動期貨價格爆升，雖然升勢二月中就起步，即月期貨都升咗三成到，但係睇埋世界盃帶動主要豬隻出產國之一巴西本土消耗等等眾多利好因素，相信八月份期貨可以上望每磅150美仙。

天氣反常 原糖值博

Kitty：我近期興食齋喎，有咩啱我啊？

潘：咁就可以考慮吓主流糧食商品大豆嘞！雖然內地對大豆需求強勁，但係美國主要種植地區有雨，利好大豆種植，供應鏈未來唔太緊張，可見現價偏高，預料即月合約月內或者可以跌到1,400美仙水平，可以部署試沽。

彩兒：我其實最鍾意食甜品o架，有咩相關期貨好炒？

劉：原糖供應充足，現時價位已經係近五年低位，我諗可以吸引商品基金吸納及國家增加收儲，而且厄爾尼諾重臨，令佔全球原糖供應領導位置嘅巴西遭受六十年來最乾旱天氣，相信產量下降配合需求增長，或者可以改變過去供過於求嘅局面，依家可以趁低吸納，博反彈到每磅18美仙嘅合理水平。

另外，早排烏俄局勢緊張，加上市場憂慮美國小麥區氣溫上升影響收成，令小麥價位衝上735美仙左右，不過之後因為小麥種植理想，供應充足而令價位回落至約600美仙，更加一度連跌十一日，相信近期有望反彈，上望650美仙。

重要數據網頁

入門級

‧美國農業部（USDA） www.usda.gov

‧聯合國糧食與農業組織（FAO） www.fao.org

進階級

‧德國網站OIL WORLD www.oilworld.biz/app.php

‧中國糧食信息中心 www.grain.gov.cn

Kitty、彩兒

若有料報畀彩兒同Kitty或有嘢問，可電郵money.biz@on.cc