講開化工，中國石油化工（00386）早排推出嘅新產品，竟然飲得落肚？新品係「易捷咖啡」，油站咖啡店是也。
中石化加油站自然多，但佢哋開嘅「易捷便利店」一樣咁多，全國有超過2.7萬間，好多係黐住佢哋嘅油站。最近中石化再於油站內搞埋咖啡店，首9家易捷咖啡上月就於蘇州嘅加油站開業。
賣嘅當然唔淨只即磨咖啡，最搞鬼係，佢哋用代表汽油種類嘅「92#」、「95#」、「98#」來做產品系列名。「92#」係「黑白咖啡」，「95#」係「時尚特飲」，「98#」就係「精品系列」，襯晒油站特色。
除此以外，佢哋仲玩埋「特產」Crossover「扶貧」，例如，咖啡X「西藏卓瑪泉天然冰川飲用水」X「甘肅天水花牛蘋果」=「蘋果冰萃咖啡」！
賣汽油做乜賣埋咖啡？你有所不知，外國成熟市場嘅加油站利潤，原來有50%以上來自非油品業務！而去年中國人均咖啡消費量係6.2杯，其中只有1杯係即磨咖啡，消費量只係美國嘅1.6%。換言之，中國呢個Market有大把增長空間！
話時話，油站咖啡店風味，到底係會聞到油味大啲，定咖啡味濃啲呢可？
余絲韻