絲絲講場：華爾街痛失「第一夫人」
絲絲最近收到一個壞消息，有「華爾街第一夫人」之稱嘅Muriel Siebert啱啱喺周末去世，享年80歲。呢位女強人除咗創下多個華爾街「第一」嘅紀錄外，一生亦致力改善金融業男性主導嘅情況。
爭取紐交所設女廁
Siebert喺一九六七年加入紐約證券交易所，係史上第一位女性成員。當時金融業仍然係男性主導，令佢加入紐交所嘅過程困難重重，佢等咗兩年先得到銀行嘅貸款幫助，以44.5萬美元購入紐交所席位；直至十年後，Siebert仍然係紐交所唯一嘅女性成員。
加入紐交所之後，Siebert發現業內更多男女唔平等嘅情況，好似有俱樂部拒絕招待女性，最令佢不滿嘅，就係紐交所嘅樓層竟然無女洗手間！Siebert貫徹佢強硬嘅性格，喺一九八七年向紐交所主席下「最後通牒」，話如果年尾時紐交所七樓仲未有女洗手間，佢就會自備「流動洗手間」咁話！最後主席當然答應佢嘅要求啦。
除此之外，Siebert仲係第一位女性紐約州銀行監察官，佢擔任監察官五年期間妥善管理業界。絲絲認為Siebert嘅成就已經向外界證明，女性喺金融界嘅能力絕不輸蝕畀男性，希望各位金融界嘅姊妹都可以延續Siebert嘅理想啦。
余詩韻