事業成功嘅男人為咗凸顯身份，都不外乎讀吓碩士博士咁，再唔係就着套靚西裝同戴番隻名錶，但佢哋做少咗樣重要嘢，就係剃光頭！因為美國賓夕凡尼亞大學有研究發現，光頭嘅男士睇起嚟特別man同有領導才能o架！
絲絲個腦即刻「彈」咗幾個光頭佬出嚟，係咪man啲，就「各草入各眼」，但做得管理層，領導能力唔差得去邊，但又好似唔係個個成功喎。
呢一刻仲屬於成功嘅，包括Netscape創辦人安德雷森、高盛主席兼行政總裁布蘭克費恩、亞馬遜舵手貝索斯同埋夢工場影業舵手謝菲基辛堡，仲有被譽為「新興市場之父」嘅鄧普頓資產管理新興國家投資團隊執行主席麥博士。
絲絲又諗起國美（00493）大股東黃光裕，由有頭髮變成光頭，最終做咗階下囚，呢一刻梗係唔屬於成功嗰批，之不過，佢第日返出嚟，可能又發圍呢，未到最後一刻都未可以定案嘅！
講番賓夕凡尼亞大學嘅研究報告，佢哋做咗個實驗，顯示344位男士嘅相，一式兩份，一張係原本個樣，另一張係用電腦技術移走啲頭髮嘅樣，比較下發現光頭樣特別有霸氣，甚至覺得高咗成吋同埋強壯啲添呀！研究仲發現，頭髮稀疏嘅男士就最唔吸引同埋睇起嚟最弱，因此佢哋建議，頭髮稀疏不如乾脆剃光佢！
有剃開光頭嘅公司高層話，個光頭look令佢睇起嚟後生啲，可以隱藏自己年齡咁話喎。
余詩韻