品牌價值評估機構Interbrand年度百大品牌榜出爐喇！今年又係可口可樂奪冠，佢由個榜九九年面世以嚟就贏足13年，估值778億美元，比上年多咗8%。講到估值大躍進就要數蘋果公司，一年狂升129%，以市值765億美元稱亞，排名跳升6級，畀Apple揮低嘅上年亞軍IBM就屈居第三。滙控（00005）跌咗1級，排第33位。
今年Interbrand百大品牌榜有唔少新面孔，好似社交網站「巨人」facebook就排第69位，仲有賣紙尿片、排第34位嘅Pampers，同埋第94位嘅萬事達卡。普拉達（01913）再度打入百大，排第84位。
有人歡喜有人愁，喺Libor造市案搞到一身蟻嘅巴克萊，同幫富豪避稅畀美國罰錢嘅瑞銀，雙雙跌出百大。英國石油上年跌出榜後，又輪到巴克萊，Interbrand董事總經理黑爾斯慨嘆，近年英國品牌唔爭氣。
畀同業打殘嘅黑莓手機商RIM市值勁縮39%，排名由第56位急降至93位。