香港證券專業學會每年都會頒授榮譽會員資格，畀一名喺業界具有崇高地位，同協助香港發展成為國際金融中心有傑出貢獻嘅人士，今年大會將會頒授予行政會議成員、滙控（00005）非執行董事史美倫。證券專業學會已訂喺十月二十七日嘅秋季晚宴上正式頒授有關資格畀史美倫。
過去攞過呢個榮譽嘅都係重量級人物，好似二○一○年度係聯交所前主席鄭維健，○九年度係港交所（00388）前行政總裁周文耀，再之前，李業廣、利國偉爵士、鍾悟思及梁定邦等猛人，都曾攞過學會呢個榮譽會員資格。
講番史美倫，佢做過香港證監會副主席、又做過中證監，依家係港交所獨立非執行董事，喺行內地位舉足輕重，獲頒證券專業學會會員架構的最高類別，可算係實至名歸！
史美倫喺港交所嘅6年任期明年將屆滿，究竟佢會離任，定係「破格」更上一層樓，市場非常關注，拭目以待！
余絲韻