絲絲講場：馬世民沽嘉漢要仔唔要乸
絲絲尋日同大家分享過，嘉能可（00805）主席馬世民，因為同近期問題多多嘅嘉漢林業關係深，近日就被人翻舊帳，話佢喺○六年尾同埋嘉漢嘅多位高層一齊減持公司股份，套現8,100萬加元，單係馬世民自己就套現咗1,080萬加元，查實佢唔係等錢使，只不過係「要仔唔要乸」。
誓查真相唔辭職
有份沽貨嘅馬世民依家喺非洲喀麥隆出差，佢證實自己確實有售出部分嘉漢嘅股份，但目的只係為咗增持嘉漢嘅子公司、在香港上市嘅綠森（00094）。馬世民講，佢係同投資者企喺同一陣線。現階段因為嘉漢嘅獨立調查報告仍在進行中，所以唔方便評論Muddy Water嘅指控，但佢就話自己唔會辭職，並用好重嘅語氣同記者講：「一定要搞清楚（make bloody sure）嘉漢沒有犯錯。」
六十年代，馬世民曾經喺法國外籍兵團服役，果然當過兵嘅男人講嘢都係豪氣啲。
余絲韻