A股牛氣沖天，滬綜指昨日上破三千點關，中資金融及券商股盡顯強勢。其中基建鐵路股近期反覆偏強，講到尾就係炒幾個大因素：內地降息減少企業負債開支、滬港通AH價差收窄、「一帶一路」推動整體基建鐵路資金投入，以及中國版「馬歇爾計劃」增加企業「走出去」的意欲。
昨日三隻相關概念股中交建（01800）、中鐵（00390）及中鐵建（01186）分別升7.7%、5.4%及4.8%，整個板塊係威係勢，加上炒作概念多多，值博率不言而喻，筆者就較鍾情於中鐵建，主因有幾個。首先，早前墨西哥取消了由中鐵建及南車（01766）等公司合組財團所競投的高鐵項目，但消息公布後中鐵建股價最低僅見7.85元後已重新發力，顯示其抗跌力不弱。另外，墨西哥方面未來再招標時，若中鐵建有幸失而復得，隨時成為股價向上催化劑。
其次，從AH價差分折，以昨日收市價計，中交建、中鐵及中鐵建H股對A股均呈折讓，而牌面睇中鐵建似乎較吸引。
再睇埋估值，以現價市盈率計中鐵及中鐵建分別約10倍及8倍，至於兩者市帳率及派息比率分別不大，皆約1.1倍及15%左右，如果純以PE計，中鐵建稍優。
走勢上，近兩周中鐵建股價在A股狂潮下愈戰愈勇，昨一支陽燭升至9.44元收市，成交亦配合，加上多條平均線持續向上開口，走勢向好，建議逢低買入，博上破10元關後挑戰一○年跌浪起步位11.2元，跌穿20日線8.5元止蝕。
DR.Stock