絲絲講場：英倫一站式財管闖港
絲絲曾經聽過一啲富戶朋友講笑，話由於持有多個私人銀行戶口，每日要同銀行家開會傾「投資建議」，都周身唔得閒。不過，倫敦資本就諗到條橋，可以幫呢啲富戶免卻麻煩。
倫敦資本與多名本地合夥人，特別成立咗一間倫敦資本亞洲，專門服務亞洲區嘅客戶外，仲引入咗一個對於亞洲而言，較為新穎嘅財富管理模式。
建議交投行執行
據倫敦資本亞洲行政總裁羅格弘介紹，有關模式主要係由倫敦資本為客戶提供一站式嘅資產管理建議，再交由已與倫敦資本簽訂合作協議嘅投資銀行執行。其好處是，客戶只需與倫敦資本溝通，就可以分配自己放喺不同投資銀行嘅資產，既省時間，又方便管理，適合日理萬機，又成日中港兩地跑嘅富戶。
聽落又好似幾吸引喎，咁「入會」有咩要求呢？羅格弘就話，由於其服務係針對客戶度身訂造，所以對客戶量要求亦係「貴精不貴多」，雖然其牌照許可嘅開戶金額最低要求係100萬美元，但估計平均額可達到500萬美元。
余絲韻