絲絲講場：「梁朝偉」幫畢馬威招才
全球都鬧人才荒，要請菁英就更加難。身為「四大」嘅畢馬威會計師事務所（KPMG）亦都好煩惱，為咗早一步mark實人才，都要出新招，甚至搵咗個疑似梁朝偉嘅員工拍宣傳片。
中港擬請兩千畢業生
畢馬威中國人力資源主管合夥人吳麗莎（Melissa），話公司絞盡腦汁諗啲新招，吸引即將投身社會嘅九十後，例如設立一個網站畀啲大學生可以了解畢馬威嘅工作環境、面試技巧，仲可以做埋大家都覺得「好神秘」嘅Aptitude Test，遲吓仲可以share上facebook。另外，公司仲搵咗一個好似「梁朝偉」嘅員工拍咗段宣傳短片，聽講開拍時，有人真係以為梁朝偉拍戲，不停影相添！
Melissa話下星期就會開始落學校講talk，今年公司將於中、港兩地招聘一千七百至二千個大學畢業生，而香港畢業生大概佔四百人，薪酬待遇都幾好，起薪點有一萬二千元；福利又幾特別，早前KPMG請完員工去睇印度人Vivek做棟篤笑，九月中又包起本港主題公園，請晒全公司嘅同事及其家眷，一齊癲番一日！
絲絲聽講KPMG未來三年，會全球招聘七點五萬名應屆畢業生，請咁多人，唔通有咩大計？Melissa笑笑口咁話，公司好重視中國發展，依家中國發展神速，機遇處處，當然要請多啲人。佢哋中港兩地有十三個辦公室，將來或會於大陸開多幾個辦公室添！下個月一日，畢馬威國際新主席Michael Andrew都拉大隊，成team人一齊進駐香港太子大廈。
余絲韻