絲絲講場：恒生張樹槐：攞克林頓簽名難忘

Walter話與克林頓兩面之緣，都係發生喺佢卸任之後，第一次係佢嚟香港參加大企業搞嘅社企活動，大家有握過手；第二次嘅會面亦係佢嚟香港出席一個活動，Walter就拎克林頓嘅自傳畀佢簽名，當時有好多人圍住佢傾偈，Walter心諗佢身邊咁多保鑣，若貿然喺紙袋攞本書出嚟，好易畀保鑣「掃低」，但又好想搵佢簽名，唯有膽粗粗試吓。點知傾緊偈嘅克林頓突然捉住Walter隻手，似乎係話簽名要等吓。

記寫名字能力驚人

Walter記得當時克林頓冇正面望到佢，但幫佢簽名時，克林頓竟然喺本書寫埋「To Walter Cheung，With appreciation」，Walter真係好感動，仲覺得克林頓好勁，只係用千分之一秒時間，用眼尾「睄吓」佢心口個名牌，就寫得出佢個名，完全冇串錯字。你知喇，對洋人嚟講，中國人嘅姓氏唔係咁易串o架。Walter話每次諗番呢件事都覺得好開心，仲話自己特登買番同一本新書嚟睇，嗰本珍藏版就放喺書櫃內，得閒拎出嚟欣賞吓。

余絲韻