絲絲講場：洪丕正畫牆嗌投降
渣打香港行政總裁洪丕正（阿Ben）尋日連同近60位同事，帶住一桶桶嘅油漆喺幅牆度油油畫畫，唔通佢哋想轉行做戶外壁畫師？其實呢個係渣打「員工義工月」嘅其中一個活動，一班管理層去到心光盲人學校，與視障學生一齊創作戶外壁畫及陶瓷磚牆飾，阿Ben仲親自畫咗隻長頸鹿添。
一班平時坐慣冷氣房嘅銀行家，要喺30度高溫下做戶外工作，阿Ben更油到大汗疊細汗，絲絲都戥佢哋辛苦。
學整灰水搞唔掂
阿Ben話雖然搞咗幾粒鐘都未搞掂，仲曬到塊面紅晒，不過佢覺得今次活動咁有意義，所以會堅持到完成為止。
睇見阿Ben手牽手咁教啲小朋友上色，油得有姿勢有實際，連絲絲都覺得佢相當專業。Ben就講笑咁話，學咗幾粒鐘整啲「灰水」（牆壁髹油前嘅工序），但始終搞唔掂，所以得出一個結論，就係銀行家始終做唔到呢方面嘅專業人士。
余絲韻