林二汶開騷悼盧凱彤：所有演出送畀佢！

盧凱彤雖已離世，但永遠活在歌迷心中。

林二汶前晚在麥花臣場館開騷，獲何韻詩、許廷鏗等到場支持。她的at17拍檔盧凱彤早前墮樓身亡，二汶於騷上不開名懷念對方：「你哋有冇試過認得一個人，唔係認得藝人嗰種，而係明明見到陌生人，但第一眼就認得，知道唔可以錯過佢！我生命中遇過呢啲人，將呢兩首歌送畀佢哋。」然後唱出at17的《最難唱的情歌》及她主唱的《最幸運的人》送給盧凱彤，並分享「The Missing Piece」的故事，她說：「無論大家幾配合，始終有一日都要長大，係好殘忍(口架)，但都係生命嘅美好。」

多謝粉絲陪伴

Encore環節，二汶在鋼琴伴奏下獻唱《無忘花》，然後分享之前為動畫《玩轉腦朋友》角色「阿樂」（Joy）配音的感受：「我真係『阿樂』，同角色一樣，唔知『阿愁』（Sadness）係點，但同角色一樣，最後都終於知道咩叫Sadness。套戲最後一幕係阿樂同阿愁一齊撳個波出嚟，我都終於知道咩叫悲喜交集，成長就係一件咁嘅事，人生以後仲有好多事教我哋知道咩叫Joy、Sadness等等，但我應承你哋，開心同唔開心嘅時候我會陪住你哋，多謝你哋都陪住我。」最後唱出《剎那的烏托邦》，演唱會圓滿結束。

戴上口罩的何韻詩與歌手岑寧兒低調睇騷。	林二汶坦言經歷不開心事件後急促成長。	林二汶憶述與盧凱彤的點滴時強忍淚水。

做足忍喊工夫

騷後二汶接受訪問時表示：「以前我係開開心心、嘻嘻哈哈，依家就長大咗，知道唔開心都唔係咁得人驚。」提到她在台上沒有哭，她笑言：「因為綵排嗰陣已經崩潰咗，所以開騷OK，做咗好多準備同練習。」她又稱：「我以後嘅演出都係送畀佢（盧凱彤），佢永遠都會喺度，佢永遠都係同我一齊，所以唔會冇佢喺度。」