新帥第一擊攞威 香港飛馬夜戰理文

「中銀人壽香港超級聯賽」今晚8時假旺角大球場上演獨腳戲,由今周改由陳浩然出任主帥的香港飛馬,主場迎戰剛敲響勝鼓的理文。雙方主帥均認為,球員比賽心態將是勝負關鍵,相信兩隊勢必有一番惡鬥。(周五晚8時開賽)

近兩仗聯賽分別不敵和富大埔及富力R&F的香港飛馬,周一宣布跟主教練柏度解約,並安排陳浩然出任主帥。連日在操練讓球員模擬不同攻守模式的「陳Sir」表示,期望一眾球員能夠在防守方面有所加強︰「我哋今季所失嘅波,都係圍繞住由攻轉守同防守死球呢兩方面,呢樣係要透過喺球場練習先可以演繹到,唔可以淨係講畀球員聽點做,所以會喺防守死球方面要求佢哋集中啲,防守時嘅企位同走位分工要清晰啲。」

陳浩然:最緊要有信心

對於理文上仗在聯賽「開齋」,陳浩然指己隊球員要有更佳的心理質素作賽︰「對手啱啱贏咗波信心都會好啲,相信佢哋依家嘅決心比戰術更加重要,所以我哋要比佢哋更加有信心去踢。」

理文上仗憑着史提芬彭利拿一箭定江山,作客以1比0小勝凱景,在聯賽打開勝利之門,並終止兩連敗,主教練陳曉明認為,隨着球員逐漸適應比賽,會有更佳的演出︰「其實球員平時練習有一啲好放膽做嘅嘢,但比賽時因為驚犯錯同比較緊張,所以會影響佢哋執行一啲動作,呢樣嘢頭幾場波,我哋都喺部分球員身上見到。我覺得上場都未能完全擺脫呢個情況,今季無論球員定教練都對自己好有期望,或多或少都有壓力,但當球員喺球季慢慢適應咗之後,情況會有改善。」

理文上仗分別有干沙利斯及戴倫度因傷先任後備,兩人有望於今仗上陣,但能否正選出戰則視乎狀態。「曉明Sir」坦言,飛馬最近戰績不佳,但仍然不能忽視:「新教練可能會將球隊一啲嘢解決,但我估計短時間內正選陣容唔會有太大變動,不過飛馬就算輸波都有唔少入球,所以我哋都要提防佢哋嘅進攻主力。」