唔少婚後男女慢慢變成怨恨夫妻，離婚後更反目成仇。不過呢個世界有條定律，叫做「世上無難事，只怕有錢人」，因此縱然離婚後男女嘅仇怨有幾大，只要有錢嘅話就乜都易話為。話說桃園有位於當地經營旅館（家陣已結業）嘅石姓男子，自去年4月開始，喺旅館兼營色情應召站，並僱用咗韓姓、謝姓等6名女子做應召女郎，而最奇嘅係佢竟然搵邱姓前妻做應召女郎，以20分鐘為一節，每節收費1,000元新台幣（約250港元）嘅超低價吸客，而石男則每次從中抽取200至400元新台幣（約50至100港元）嘅佣金。喺低價嘅誘惑下，應召站嘅生意相當唔錯，唯獨邱姓前妻生意唔係咁好。石男都真係「有情有義」，為咗令前妻嘅生意好轉，於是推出8折優惠，即每節只係800元新台幣（約200港元）。究竟生意會唔會有起色呢？唔好意思，因為仲未見到有冇效果前，呢間應召站已經被警方破獲，而石男早前喺法庭上亦坦承罪行，結果被判6個月有期徒刑，同被罰款20萬元新台幣（約5萬港元）。