自去年發生北京和頤酒店事件後，有關當局開展大規模打擊卡片黨嘅行動。事隔年幾後，正當大家以為打擊力度減弱之際，其實有關當局一直都未有放鬆，好似湖北武漢警方自3月24日開始，喺全市展開為期兩個月嘅整治酒店卡片黨行動，至今已經破獲18宗，拘留疑犯22人，收繳招嫖卡片超過3,300張。其中一宗喺4月12日進行掃蕩行動中，警方發現一名男子經常喺江夏紙坊鎮一間酒店內派發招嫖卡片。巡邏大隊即時進行跟蹤搜證行動，並且喺酒店附近埋伏監視。直到12日傍晚6點，呢位神秘男子再次喺酒店現身，埋伏警員即收縮包圍圈，而喬裝酒店住客嘅警員，待男子喺酒店房門攝入卡片之後，將對方拘捕。經過偵訊後，警方連夜喺男子租住嘅房間中，搜獲過萬張招嫖卡片，同時起獲212個安全套。據呢位被捕31歲鄭姓男子稱，卡片從外地郵寄過嚟，而警方表示將會繼續追查鄭男嘅上線。喺武漢警方嚴打卡片黨同時，佢哋亦督促各酒店，加強舉報並宣傳禁制卡片黨嘅活動。