羅斯缺陣 靠佢滅火 盧卡斯最牛一夜

占士都勒佢唔住

「now TV NBA之旅」最後一日迎來「東岸決賽前哨戰」，本報記者早於開波前兩小時便抵達聯合中心，場館門外一片紅海，「Beat the Heat！（打低熱火）」口號此起彼落。賽前公牛教練泰保杜受訪時宣布，去季常規賽MVP羅斯因鼠蹊傷缺陣，令到不少公牛躉相當失望，就連場館「揸（車立）人」都打定輸數。

不過，公牛球迷依然落足力打氣，每當勒邦占士及韋迪掂波都噓到拆天，但講到致勝英雄，則肯定非盧卡斯莫屬！這位29歲控衞於末節On Fire，連取9分，一度為公牛將領先優勢擴大至12分，迫使「大帝」在餘下時間親自「招呼」盧卡斯，但依然「勒佢唔住」，最終盧卡斯攻入全隊最高的24分，率領公牛以4分之差贏波。

二打六突變英雄

05年選秀會「冇人吼」，先後被火箭及熱火裁走，加上淪落到要打D-League，盧卡斯的崎嶇NBA之路與林書豪十分相似，賽後盧卡斯搖身一變成為大球星，於更衣室內被大批記者圍訪。至於熱火教練史普斯達賽後受訪時都對盧卡斯讚不絕口：「佢意志堅定，努力改進自己，我覺得盧卡斯簡直係球員嘅典範。」

公牛除盧卡斯打出代表作外，隊友諾亞亦都交足貨，昨仗就兩度封阻韋迪上籃贏盡球迷掌聲，賽後這位法國中鋒貫徹癲喪本色，突然「貓王」上身，喺場館通道大跳「開槍舞」，睇到附近的保安個個「○晒嘴」！