採訪大型運動會，最重要就係懂得爭分奪秒，用盡時間去搜羅好料畀讀者，但有時就因為一啲「Stupid Question」，耽誤了眾人時間。
小記尋日去到壁球館採訪，有份參與個人賽嘅四位女球手，賽後都有出席記者會。某位記者喺會上發問：「比賽完結後可以放鬆一下，你們會做甚麼？」此話一出後，大部分記者都為之側目，因為大家都知道四位球手嘅亞運旅程仲未結束，今日仲要打團體賽，所以其中一個運動員率先表示：「爭取休息！」而其餘三人亦連接咁講「我都係！」、「我都係」同「我都係」，搞到氣氛頗為尷尬。
其實小記並唔係想挖苦呢位記者，只係想佢知道，記者會上一個問題要經過發問、翻譯、解答、再翻譯，基本上都要花成數分至十分鐘，若然唔做足功課就問出呢啲「Stupid Question」嘅話，就耽誤了場內運動員、傳媒同職員嘅寶貴時間，一個人幾分鐘，幾百人就幾千分鐘架啦！試問你過唔過意得去先？