祖高域死拚費達拿

【本報綜合報道】今年在法網遭瑞典球手蘇達寧淘汰嘅費達拿,美網八強戰成功復仇,佢以6比4、6比4及7比5拍走「掃把星」,四強將對祖高域。「扮嘢王」祖高域亦喺八強輕鬆過關,直落三盤擊敗法國球手蒙菲斯,連續四年殺入四強。

亨利撐場幫唔到蒙菲斯

「費天王」為報一箭之仇,今場打得特別肉緊,全場打出十八個A士下,直落三盤橫掃對手。費達拿出線後遇上老對手祖高域,兩人已連續三屆在美網四強碰頭。

祖高域在八強以7比6(7比2)、6比1及6比2淘汰法國球手蒙菲斯,佢賽後話會以畢生功力去擊敗費達拿,因為佢近屆美網去到四強階段,都遭費達拿淘汰。至於蒙菲斯雖有同鄉、効力美職球會紐約紅牛嘅足球明星亨利撐場,但依然黯然出局。