迪奧多斯成NBA獵物
【本報綜合報道】「歐洲第一控衞」迪奧多斯在八強射出一記遠程三分波，為塞爾維亞絕殺西班牙後，旋即成為今屆世錦賽紅人，仲引來唔少NBA球隊垂青，包括今夏爭贏勒邦占士、組成「超級三巨頭」嘅熱火，同有「小巨人」姚明孭飛嘅火箭，估計人氣急升嘅迪奧多斯將好快登陸NBA。而復仇成功嘅塞爾維亞，四強會對東道主土耳其。
享「歐洲第一控衞」美譽
歐洲兩大宿敵在八強碰頭，結果塞爾維亞將士用命，以92比89殺敗上屆冠軍西班牙，總算報回去年歐錦賽決賽一敗之仇。今場贏波功臣當數年僅廿三歲，有「歐洲第一控衞」之稱嘅迪奧多斯，呢位樣貌老成嘅年輕後衞，其實喺歐洲早已大有名氣，從○三年開始，佢先後帶領塞爾維亞U16、U18及U20國家隊奪過歐錦賽金牌，其中○七年更攞埋賽事MVP，被評為歐洲最矚目新星。
土耳其大炒斯國闖四強
迪奧多斯今年大豐收，除助奧林比亞高斯奪得希臘盃冠軍外，亦帶領球隊殺入歐聯決賽，雖然最終不敵巴塞隆拿，但迪奧多斯就獲選為歐聯MVP，因而被傳媒稱為「歐洲第一控衞」，強過名氣較大嘅西班牙新星盧比奧。事實上，呢兩大歐洲控衞今場正面交鋒，迪奧多斯光芒亦盡蓋乏善足陳嘅盧比奧。
另一場八強賽，東道主土耳其輕鬆以95比68大勝斯洛文尼亞，効力公鹿嘅伊耶蘇華攻入最高19分，另隊長陶告魯奪得10分，均屬贏波功臣。
世籃賽程（香港時間）
周五11:00pm（5至8名次賽）西班牙Vs斯洛文尼亞
註：中央5台直播