中環出更：愛女搜羅至愛手袋 蔡太心甜
玩具大王蔡志明千金蔡加怡（Crystal）上月結婚後，火速去歐洲度蜜月，近日身在巴黎，不忘透過手機發短訊報平安，仲四出搜羅媽咪蔡李惠莉至愛嘅「包中之王」Herme's手袋，真乖女。
保良局總理蔡太尋日出席《星光熠熠耀保良》記者會，講起囡囡及女婿就心甜，佢話見到Crystal發自內心嘅幸福笑容，個心安樂晒。Crystal已歐遊廿多天享受二人世界，去到邊買到邊，蔡太拍心口叫女兒盡情購物，返到香港，一定安排專人接機喎。媽咪咁體貼，Crystal都識做，專程去Herme's專門店買番個出爐新款皮袋送畀媽咪。
梁寶珠籌款新橋多
保良局主席梁寶珠上任後，籌款新橋不絕，佢預告嚟緊節目多，十月將喺九龍區開設三千呎醫療中心，又成立醫療基金，資助貧苦大眾睇病，依家已籌得逾三千萬元。此外，十一月會搞全港首個《萬人齊唱帝女花》活動，點子認真多。
卓妮