本文重點
西甲聽日開鑼，《東方波經》為隆重其事，專登派小記去咗馬德里，到皇家馬德里主場巴拿貝球場（Bernabeu）朝聖，同大家作賽前最後熱身。要感受施丹、碧咸、魯爾、C朗同卡卡魅力，最緊要有時間，因為由買飛、入場參觀、買波衫印字，甚至埋收銀處畀錢，全部都要排隊，閒閒哋都要等一個鐘，做fans真係要好有耐性。
巴拿貝球場及博物館遊覽團平日開放時間係朝早十點至晚上七點，星期日及公眾假期就開放同關閉時間都少半個鐘，小記早喺九點半到場，但係已經有兩條大人龍，一條排買飛，一條排入場。
十五歐元（約一百六十五港元）嘅飛排咗近一個鐘先買到，跟住再排隊入場，輪候時間都幾長，唔單止因為人數多，仲因為遊覽團先要經過保安檢查行李，仲要搭只可以容納十六個人嘅電梯由頂樓博物館開始遊覽，呢度又等咗成粒鐘。
不過，入到博物館，之前呆等嘅兩個鐘你絕對會覺得值得！迎接你嘅係一大堆珍貴皇馬文物，除咗舊波衫同大量獎盃，你仲會搵到球王施丹嘅西甲球員註冊證，皇馬珍貴歷史盡現眼前。
文物博覽踩入禁地
離開博物館，大家就可以正式踏入球場，原本遊覽團可以畀你踩入草地，兼且坐喺球員座位，可惜小記到訪當日啱啱換緊草皮，未能一腳踩落呢塊曾經有「大哨」朗拿度、施丹同碧咸都踢過嘅草地上。
離開草地之後，會經過VIP座位、更衣室、記者室，最後目的地當然係專賣店。喺度提醒大家，喺專賣店瘋狂購物嘅同時，請搵定同行朋友幫你排住隊先，因為排隊畀錢都要排成粒鐘，而且如果你要買番件波衫，排隊印心水球員冧巴同名都要等半粒鐘，真係少啲時間都唔掂。
朝聖完畢，滿載而歸步出巴拿貝，睇睇手錶，嘩，原來已經下晝三點，唔經唔覺喺度用咗接近五個鐘，真係「開心嘅時光過得特別快，又係時候講拜拜」！
周兆年西班牙直擊