政情：過來人設社企 為基層「加油」
通脹猛於虎，唔少基層市民都諗計節衣縮食，但柴米油鹽等生活必需品就節無可節。出身基層嘅企業家周佩波（Wayne）同參加過電台節目《窮富翁大作戰》嘅黃岳永，因為親身經歷過貧窮，於是決定成立一間叫「加油香港企業」嘅新社企，以比市價低三成嘅價錢向基層市民出售日常用品，減低生活負擔，由四月開始和非牟利團體、地區組織及小商店等合作試售食油。
曾經露宿街頭嘅Wayne細個因為父母離異，同妹妹相依為命，讀大學時住喺深水埗劏房，仲曾經因為落大雨水浸而搞到露宿街頭五日，要喺公園同橋底流連。不過，佢並冇自暴自棄，仲積極改變當時狀況，讀書時做三份兼職，至今已經成為一間企業嘅董事。
寄語波折後會反彈
至於Wayne當年點樣面對逆境？佢就話不停用自己嘅名字「波」嚟勉勵自己，話人生就好似一個波咁，打得愈大力，之後就彈得愈高，寄語時下年輕人，遇到挫折唔好灰心，因為每一次面對挑戰都會變得更強。