政情：復古「莊公主」

近個多月係春茗嘅高峰期，早前中電亦搞員工春茗，仲大玩復古風，好多人都以七十年代嘅流行裝束赴會，令會場恍如時光倒流。中電企業發展總裁莊偉茵（Quince）更粉墨登場，以影迷公主嘅造型獻上勁歌熱舞，將氣氛推向高潮。Quince話，佢嘅裝扮係以年輕陳寶珠為藍本，所以頭箍同長假髮一定唔少得，加多副懷舊太陽眼鏡，增添幾分星味。不過，講到一身衣着嘅焦點，就肯定係已經難得一見嘅喇叭褲喇。雖然Quince嘅懷舊裝束維肖維妙，但為免跳舞「拗柴」，Quince話唔敢着鬆糕鞋上陣喎！