政情：麥列菲菲無憾離英基
早排直資學校搞到滿城風雨，令人諗起同樣由政府資助嘅英基學校協會，英基喺○四年被審計署狠批行政同財政混亂，立法會政府帳委會曾經四度「公審」前英基主席麥列菲菲同其他校方高層，原來由嗰陣開始，麥列菲菲做咗英基主席成七年咁耐，到上兩個月正式退任，抱孫為樂。
唐家成接棒
政府尋日公布，會計師唐家成獲選為新任英基主席，任期正式生效，為期三年，唐家成喺財務管理方面具有豐富經驗，仲係大學教育資助委員會嘅成員，對教育工作絕不陌生。唐家成話，自己兩個小朋友由小學至第十三班都喺英基接受教育，佢決心令英基繼續為社會提供優質教育。
記得麥列菲菲做主席期間，英基正陷入困境，但由佢帶領英基改革，唔單止令原本過時同複雜嘅管理架構，改組成一個由直選家長代表、獨立成員、校董會主席委員會代表組成嘅全新管理局，同時又引入國際文憑試（IB），成功帶領英基走出陰霾。