中環耳目：陳家偉推介乒乓蠔仔粥
高大靚仔嘅美國家得路（CATALO）執行董事陳家偉（Calvin），係本港唔少商會組織嘅生力軍，活動有佢出現，總為現場增添幾分年輕活力。雖然佢外形洋化，但卻有個地道嘅中國胃，至愛幫襯有三十年歷史嘅灣仔駱克道新光潮州菜館，必食之選係「乒乓蠔仔粥」。
多紅星幫襯
Calvin話，乒乓蠔仔粥係新光潮州菜館嘅招牌菜式，佢哋採用台灣入口嘅蠔仔，粒粒拍得住乒乓波咁大，咬開甜汁四溢，加上雞湯炮製嘅靚粥底，難怪食客讚不絕口。除咗乒乓蠔仔粥外，Calvin話菜館嘅蠔餅同鵝肉一樣勁好食。新光潮菜不乏城中名人幫襯，好似劉嘉玲、梁朝偉等明星，愈夜愈熱鬧。
Calvin係中華廠商會青年委員會成員，又係優質旅遊服務協會委員，佢將父親喺美國建立嘅加工食品批發生意，擴大到零售市場，並且自創CATALO健康食品品牌，現時佢個品牌喺中港市場愈來愈受歡迎。