政情：李家仁愛犬車禍截肢 上報紙
有「小明」之稱嘅兒歌醫生李家仁，早前喺網上分享一張佢少年時代同愛犬嘅合照，又附上標題「三腳狗惹人憐愛，仁慈主人報忠心」嘅舊剪報。好明顯，佢嘅愛犬曾經成為報道焦點，但剪報內文提到小狗不幸車禍受傷，主人帶佢去睇跌打喎！愛犬受傷點解唔去睇獸醫咁奇怪呢？
澄清睇獸醫唔係睇跌打
據呢篇50多年前嘅舊剪報所載，指灣仔有一隻小狗被車輛撞傷右前足，其主人雖立即抱起並逕送跌打醫生診治，惟多個月後神經壞死痊愈無望，主人打算將其送往防止虐畜會人道毁滅，但後來發覺小狗已經懷有身孕不忍奪其命，改為截去瘸肢以度餘生。
李家仁話，事實係見愛犬拖住右前腳行走，推斷喺路邊被汽車撞到，於是送往防止虐畜會見獸醫，檢查後先知右前腳神經嚴重受損，再走路嘅機會係零。家人雖曾以皮革包裹其傷足，但仍磨損發炎，最終家人達成共識，為愛犬截去瘸肢。既然愛犬無睇過跌打，點解報章會出現咁嘅報道呢？佢都話不明所以。