政情：立會新樓或延期入伙
我哋喺今年二月率先爆料，話位於添馬艦嘅立法會新大樓工程延誤，令到暑假搬屋嘅美夢可能落空，可能要延到聖誕節搬屋。眨眼間已三個月，立法會主席尋日同傳媒聚會時話，唔會為咗趕搬屋而降低對運作安全嘅要求，聲言如果暑假搬唔成，「合理諗法」係下屆立法會先搬，估唔到延誤情況會發展到咁惡劣。
立法會一旦要延到下屆搬屋，煲呔曾想喺新大樓宣讀最後一份施政報告嘅圖謀將被粉碎，甚至出席新大樓答問大會都無機會，唔單止咁，佢嘅難兄難弟財爺鬍鬚曾、患腎衰竭嘅教育局局長孫明揚、以及多位不再連任嘅議員都或無法享用新大樓。
新大樓工程可謂一波三折，就連擺放喺新大樓嘅藝術品都出事，唔係作品太普通，就係藝術家因為技術問題而放棄。開講都有話：好嘅開始係成功嘅一半，新大樓未落成就遇到咁多甩漏同風波，特區政府真係要好好反省吓喇！