政情：民記踢走政府爛包袱

民建聯喺總部召開一年一度會員大會，由主席譚耀宗主持，一眾核心高層包括四位副主席劉江華、蔣麗芸、溫嘉璇同張國鈞等人全部亮相，連「嫁入」港府嘅商務及經濟發展局副局長蘇錦樑都返娘家撐場，最後由出席黨員通過過去一年工作報告同財務報告，一張反對票都無，體現親中政團嘅「大和諧」作風。

作為親中最大黨，民建聯果然係「吸水大笨象」，譚Sir匯報，喺○九年四月至今年三月，民記總收入達到六千四百八十萬元，比去年吸多二百萬元，而總支出為六千四百一十八萬元，盈餘六十二萬元。譚Sir解釋，民記今年開多咗地區辦事處、請多咗人手，經費需求亦大咗喎。政黨開支年年唔同，但好似民建聯咁隨時揼到心口填平條數，睇怕民主派政黨無乜邊個做得到。

「是其是 非其非」 為選舉鋪路

涉嫌捲入強姦案嘅社民連任亮憲，曾經喺會員大會發動「倒閣」，民建聯嘅會員大會，就唔慌會出現咁激場面，但今年都有好戲睇。譚Sir匯報過去一年工作報告時，當着在場逾百位忠誠支持者表明，民記對港府政策一向係「是其是，非其非」，有違民意，民記唔會支持。佢跟住列舉三件同政府唱對台嘅事例，包括將軍澳堆填區擴建計劃、復建居屋，同最近嘅申辦二○二三年亞運會事件，公開同港府劃清界線。至於政治歷史名詞「執政聯盟」，譚Sir梗係半粒字都無提啦。

譚Sir突然講同港府關係，據聞當中另有玄機，事關喺政改一役，港府同民主黨眉來眼去，同民記事先唔打招呼。經此一役，民記決定以後政府嚟拉票，一於鋪鋪清，譚Sir尋日表態，就係向政府示警。民記唔做絕對保皇黨，大家不妨聽住先，最終龍定鳳，到阿爺下次吹雞先至知！