政情：百仁基金為病童覓名醫
集富豪二、三代組成嘅百仁基金，過去成立兩年半以來一直關注本港弱勢社群嘅需要，定期探訪需要援助嘅家庭。百仁基金主席施榮忻（Jamie）尋日又出動，聯同副主席楊華勇及林智彬、會員莊家蕙及鄭詩韻，一齊前往探望一名患上EV-71型腸病毒而下半身半癱瘓嘅三歲女童李欣樂，最後決定運用百仁基金會員喺內地嘅人事脈絡，尋找理想中醫師為欣樂治療。
染腸病毒致半癱瘓
現年三歲嘅李欣樂居於葵涌石蔭東邨，與父母、弟弟及祖父母同住，欣樂兩年前跟隨媽咪返大陸，回港後突然發燒及傷風咳，最後證實感染EV-71型腸病毒，病毒更影響脊髓，令下半身半癱瘓，只有左腳剩餘五成活動能力。欣樂母親四出尋訪名醫，後來覓得一名中醫為欣樂針灸，病情才獲得好轉，可惜醫療費高昂，令欣樂一家頓感徬徨。
百仁基金最近透過社工獲悉欣樂嘅不幸個案後，尋日帶同果籃和兒童故事書前往探訪。施榮忻話，百仁基金都希望透過成員喺內地嘅良好人事脈絡，尋覓更好嘅中醫師為欣樂治療。楊華勇與鄭詩韻就讚揚李太幾年來為欣樂四出奔波嘅毅力，莊家蕙就希望藉今次探訪喚起更多人對弱勢社群嘅關注。