政情：潘佩璆幫理不幫親家
最低工資明年五月就會實施，工聯會勞工界立法會議員潘佩璆前日出席香港青年協會嘅「青年立法會會議」活動，同幾十個中學生分享時自爆，自己嘅親家對最低工資都有憂慮，雖然係咁，親家都從來冇藉住關係向佢施壓或吐苦水。
活動上面，班中學生討論到有關最低工資嘅議題。潘佩璆承認，自己係聯合醫院精神科顧問醫生，睇落唔屬於基層，但佢亦深切感受到基層市民生活嘅壓力同苦況，令佢下定決心幫一啲基層工友爭取權益。潘醫生透露，自己親家經營食肆，實施最低工資對佢哋都會有影響，不過親家絕對冇向佢施壓或者吐苦水，因為大家都知道佢喺呢件事上立場絕對堅定，即使呻都冇用。
不過好彩，潘醫生親家嘅食肆生意近年算唔錯，所以即使對呢個政策有憂慮，但亦一定會守法出足糧畀工友，即係唔會扣飯鐘錢喇。話時話，潘醫生咁肯同年輕人溝通，莫非都係為咗喺港島直選立法會落工夫？