中環出更：送50萬元支票 曾憲梓獎勵林丹
中國羽毛球好手「超級丹」林丹自○八年勇奪奧運金牌後，今年亞運再下一城奪得男單金牌，為國家爭光。向來積極支持國家發展嘅前全國人大常委曾憲梓，尋晚就喺其九龍塘大宅設宴款待林丹及其主教練李永波，仲大手筆送出五十萬元支票獎勵林丹。
巧妙回應婚訊
尋晚林丹同李永波與公子李根一齊出席晚宴，其他賓客仲有亞視大義工王征、中聯辦官員及傳媒朋友等，曾憲梓就率領大仔智謀、二仔智雄及細仔智明招呼賓客。咁熱鬧，點少得卓妮！林丹係福建龍岩市嘅客家人，曾老喺席上大讚林丹過去喺多場公開比賽中擊敗強敵，為客家人增光，所以一早預備一張五十萬元支票送畀林丹，還送上自己嘅墨寶「客家之子」四個大字，以表客家人一點心意。林丹亦禮尚往來送上一件參賽着嘅球衣，即場親筆簽名送畀曾老作為答謝。
近日傳出林丹已向其所屬部隊遞交報告申請結婚，卓妮即場問林丹何時結婚、可否公布喜訊？林丹無正面回應，指着曾大宅笑笑口話：「甚麼時候我能在香港買這麼大的房子，我才考慮結婚！」林丹答得巧妙又謙讓。
曾老尋晚喺大宅筵開十席自助餐，全部由佢細仔曾智明嘅明星太太黎瑞恩一手包辦。黎瑞恩前晚至知道要籌備逾十席食物，但老爺堅持點都要安排啲傳統客家菜，不能只叫到會，所以最後叫咗啲外賣靚魚生Toro、三文魚、龍蝦沙律、生蠔，佢同曾家傭人煮咗客家名菜梅菜扣肉、炒米粉等，個個食到舔舔脷。
卓妮