中環出更：名人着「制服」為田二少省招牌
為促進廣州、佛山、肇慶市經濟社會發展及珠三角地區一體化，以中華總商會永遠榮譽會長霍震寰為首嘅名人組成「香港廣佛肇聯誼總會」，前晚喺灣仔會展舉行成立就職典禮，筵開一百四十席，場面墟冚。身為創會人之一嘅港區全國人大代表田北辰居功不小，事關佢大開旗下「G2000」時裝店門，慷慨贊助會場內主要嘉賓嘅服裝，一眾名人齊齊着「制服」，變相為「G2000」省招牌。
田二少今次贊助男士恤衫同領呔，女士就配上搶眼嘅紅色外套，總共贊助咗幾十套衫。田二少仲落足本錢，男士恤衫同領呔使用嘅質料，比「G2000」舖頭出售嘅更上乘，至於女士嘅紅色外套仲係非賣品添！值得一讚嘅係，所有獲贊助靚衫嘅嘉賓都獲安排度身訂造，保證fit到漏，難怪在場有好多人向佢致謝。
女士撞衫 各有配襯
至於近期同田二少「談婚論嫁」嘅匯賢智庫主席葉劉淑儀，亦係總會創會人之一，佢今次與同係創會人嘅基本法委員會副主席梁愛詩、恒生女大班梁高美懿、立法會議員梁美芬及李慧琼刻意撞衫着住紅色外套，但各有各配襯，各自各精彩！
「香港廣佛肇聯誼總會」首屆主席由霍震寰出任，執行主席就由劉軍出任，創會成員除咗上述名人，仲有恒基地產副主席李家傑、中港照相器材集團主席孫大倫等，霍震霆二仔啟山就做總會嘅青年部副部長，同霍震寰兩叔姪拍住上。