政情：蘇錦樑投訴搵錯對象
競爭法係議事堂嘅新戰場，早前商務及經濟發展局副局長蘇錦樑上立法會經濟事務委員會解畫，被議員輪流炮轟，而佢嘅民建聯黨友只作壁上觀，經歷如此一幕，經歷國籍風波同卡片事件嘅蘇錦樑，喺政治又上多深刻一課。
不過，政治呢門藝術的確深奧弔詭，上完堂有時都未必學到嘢，盛傳蘇錦樑喺經濟事務委員會被議員炮轟到體無完膚後，竟然私下向委員會主席梁君彥訴苦，問佢點解唔阻止議員發炮，仲點名埋怨總商會代表林健鋒發炮太狠，聽到蘇錦樑講呢番話嘅人，都為之失笑，笑指蘇錦樑太唔熟政治嘞。
梁君彥係工業總會立法會代表，工總視競爭法為仇人，去之而後快，梁君彥見議員狂轟競爭法，心裏面笑都笑唔切，又點會出言阻止議員發炮呢？仲有，梁君彥同林健鋒同屬經濟動力，私底下更加係老死，林健鋒要喺會上發言狠批競爭法，係向商界選民交代，所以，蘇錦樑向梁君彥投訴，係咪唔知碇呢？