政情：鐵頭仁赴挪威「受阻」
諾貝爾和平獎頒獎畀劉曉波，激發外交風波，民主黨主席「鐵頭仁」何俊仁等前晚搭夜機前往挪威準備觀禮，行程亦受阻！唔好誤會，無關政治，只係歐洲刮大風雪，導致飛機航班延誤啫。鐵頭仁同其他三名赴會者「落難」異鄉，滯留瑞士蘇黎世機場，雖然可以出席今日嘅頒獎禮，但就錯過原定尋日挪威下午三點去中國駐挪威大使館門外抗議嘅活動。
今年諾貝爾和平獎頒獎禮，共有六名港人獲邀做嘉賓，「長毛」梁國雄喺前日朝早就出發，而同鐵頭仁一齊出發，但取道荷蘭轉機嘅劉慧卿，亦順利喺挪威時間尋日中午時分抵埗奧斯陸。但另外四人，即以中國律師關注組主席身份赴會嘅鐵頭仁、支聯會副主席李卓人、社民連主席陶君行同獨立中文筆會副會長潘嘉偉就無咁好彩，揀喺蘇黎世轉機，撞正大風雪，抵達挪威時已經係夜晚七點。四人「滯留」消息一出，有網友留言話，歐洲刮大風雪，大家應該早一日出發，都係長毛有見地。